அப்துல் கலாமின் 90வது பிறந்தநாள்; தலைவர்கள் வாழ்த்து

புதுடில்லி: முன்னாள் ஜனாதிபதி அப்துல் கலாமின் 90வது பிறந்தநாளை முன்னிட்டு பல்வேறு அரசியல் தலைவர்களும் வாழ்த்து தெரிவித்துள்ளனர்.

தமிழகத்தில் ராமேஸ்வரம் மாவட்டத்தில் பிறந்தவர் ஏ.பி.ஜே அப்துல் கலாம். சிறுவயதில் ஏழ்மையின் பிடியில் சிக்கிய அப்துல்கலாம், கல்வியில் சிறந்து விளங்கி, இந்திய விண்வெளி துறையான இஸ்ரோவில் பணிக்கு சேர்ந்தார். வாஜ்பாய் பிரதமராக இருந்தபோது அப்துல் கலாம் தலைமையில் அணு ஆயுத சோதனை நடத்தி, இந்தியா தனது பலத்தை உலகிற்கு வெளிக்காட்டியது. இதன்மூலம் புகழ்பெற்ற அப்துல் கலாம் நாட்டின் ஜனாதிபதியாகவும் பதவி வகித்தார்.

இளைஞர்கள், மாணவர்களுக்கு தன்னம்பிக்கையூட்டும் வகையில் சொற்பொழிவாற்றும் இவரது பிறந்தநாளான அக்.,15 ஐ.நா சபையால் உலக மாணவர் தினமாக 2010ம் ஆண்டு நிர்ணயிக்கப்பட்டது. அன்று முதல் ஒவ்வொரு ஆண்டும் உலக மாணவர்கள் தினமாக அக்டோபர் 15ம் தேதி அனுசரிக்கப்படுகிறது. இவர் 2015ம் ஆண்டு ஜூலை 27ல் மாணவர்களுடன் உரையாடிக் கொண்டிருக்கும்பொழுதே மாரடைப்பில் காலமானார். இன்று (அக்.,15) அப்துல் கலாமின் 90வது பிறந்தநாளை முன்னிட்டு பல்வேறு அரசியல் தலைவர்களும் வாழ்த்து தெரிவித்துள்ளனர்.

ஜம்மு காஷ்மீர் சென்றுள்ள ஜனாதிபதி ராம்நாத் கோவிந்த், உதம்பூரில் உள்ள வடக்கு பிராந்திய ராணுவ அலுவலகத்தில் கலாமின் புகைப்படத்திற்கு கோவிந்த் மலர்தூவி மரியாதை செலுத்தினார்.