தடுப்பூசி பணியை வேகப்படுத்த பிரதமர் மோடி உத்தரவு

புதுடில்லி : கொரோனா வைரஸ் பரவல் அதிகரித்து வருவது குறித்து பிரதமர் நரேந்திர மோடி நேற்று ஆய்வு செய்தார். மாவட்ட அளவில் மருத்துவ உட்கட்டமைப்பு வசதிகளை மேம்படுத்தவும், தடுப்பூசி போடுவதை வேகப்படுத்தவும் அவர் உத்தரவிட்டுள்ளார்.

கொரோனா வைரஸ் பரவல் மூன்றாவது அலை நாடு முழுதும் பெரும்தாக்கத்தை ஏற்படுத்தி உள்ளது. இது குறித்து, பிரதமர் நரேந்திர மோடி நேற்று சுகாதார மற்றும் உள்துறை அதிகாரிகளுடன் ஆய்வு செய்தார்.

இது குறித்து பிரதமர் அலுவலகம் வெளியிட்டுள்ள செய்தியில் கூறப்பட்டுள்ளதாவது: கொரோனா வைரஸ் புதிய வகைகளில் உருமாறி வருவதால் பரிசோதனை, தடுப்பூசியிலும் மாற்றங்கள் செய்வது குறித்து ஆய்வுகள் செய்யப்பட வேண்டும். இது தொடர்பாக தொடர் ஆய்வுகள் நடத்த பிரதமர் வலியுறுத்தினார்.

முக கவசம் அணிவது, சமூக இடைவெளியைப் பின்பற்றுவது போன்றவை தற்போதைய புதிய இயல்பாக மாறியுள்ளன. இவையே, வைரஸ் பரவல் வேகத்தைதடுக்கும். மேலும், தடுப்பூசியும் முக்கிய கவசமாக செயல்படுகிறது. இது தொடர்பாக பொதுமக்களிடையே விழிப்புணர்வை ஏற்படுத்த வேண்டும். மாவட்ட அளவில் மருத்துவ உட்கட்டமைப்பு வசதிகளை மேம்படுத்த நடவடிக்கைகள் எடுக்கப்பட வேண்டும். அனைவருக்கும் தடுப்பூசி போடப்படுவதை உறுதி செய்ய வேண்டும்.

இது தொடர்பாக மாநில முதல்வர்களுடன், அந்தந்த மாநிலத்தில் உள்ள சூழ்நிலைக்கு ஏற்பஎடுக்கப்பட வேண்டிய நடவடிக்கைகள் குறித்து ஆய்வு செய்யப் போவதாக பிரதமர் கூறியுள்ளார்.

கொரோனா வைரஸ் பரவல் தடுப்பில் முக்கிய பங்காற்றும் முன்களப் பணியாளர்களுக்கு, 'முன்னெச்சரிக்கை டோஸ்' தடுப்பூசி வழங்குவதை ஒரு இயக்கமாக செயல்படுத்தவும் அவர் வலியுறுத்தியுள்ளார்.

நாடு முழுதும், 15 - 18 வயதுடைய சிறார்களில் 31 சதவீதம் பேருக்கு தடுப்பூசி செலுத்தப்பட்டுள்ளதாகவும் பிரதமர் தெரிவித்தார். இவ்வாறு அதில்கூறப்பட்டுள்ளது.